Azərbaycanın Gənclər və İdman naziri Azad Rəhimov və "Formula 1" Şirkətlər Qrupunun baş icraçı direktoru Çeyz Kerri Bakıda keçirilən "Formula 1" yarışlarının daha üç il müddətinə uzadılması barədə müqavilə imzalayıblar.

"Formula 1 Qran Pri" yarışlarının Bakıda keçirilməsi üçün müqavilənin müddəti 2020-ci ildə bitir. Bunu nəzərə alaraq biz yenidən 3 illik müqavilə bağladıq. Artıq 2020-2023-cü illərdə də "Formula 1 Qran Pri"si Bakıda keçiriləcək", - deyə Azad Rəhimov deyib.

Bu il Bakıda artıq 4-cü dəfə keçiriləcək "Formula 1" yarışlarına aprelin 26-dan start veriləcək.

Azərbaycanda "Formula 1 Qran Pri" yarışlarının keçirilməsi ilə bağlı qərar 2013-cü ildə verilib. Müqavilə 2016-2020-ci illəri əhatə edib. İlk yarışlar 2016-cı ildə keçirilib.