Mayın 17-də Gəncə Apellyasiya Məhkəməsi tanınmış hüquqşünas Yalçın İmanovun şikayətinə baxıb.

GancaPost xəbər verir ki, hakim Afiq Hüseynzadənin sədrlik etdiyi prosesdə Yalçın İmanov Gəncə İnzibati-İqtisadi Məhkəməsinin 22 fevral 2019-cu il qərarının ləğvini istəyib.

Proses zamanı Gəncə Apellyasiya Məhkəməsi vəsatətləri, eləcə də şikayətləri təmin etməyərək Yalçın İmanovun vəkillik fəaliyyətinə xitam verilməsi barədə qərarı qüvvədə saxlayıb. Beləliklə, 22 fevral 2019-cu il Gəncə İnzibati İqtisadi Məhkəməsinin çıxardığı qərar qüvvədə saxlanılıb.

GancaPost saytına danışan Yalçın İmanov hüquqlarının müdafiəsi üçün sonadək mübarizə aparacağını, Gəncə Apellyasiya Məhkəməsinin qərarından Ali Məhkəməyə şikayət verəcəyini bildirib.

Xatırladaq ki, Vəkillər Kolleqiyası Rəyasət Heyəti 20 noyabr 2017-ci il qərarı ilə Yalçın İmanovun vəkillik fəaliyyətinə xitam verilməsi üçün məhkəməyə müraciət edib. Məhkəmə baxışına qədər Yalçın İmanovun vəkillik fəaliyyəti dayandırılıb. Rəyasət Heyətinin qərarı Penitensiar Xidmət rəhbərliyinin şikayəti əsasında çıxarılıb. Həmin şikayətdə bildirilib ki, Yalçın İmanov hüquqlarını müdafiə etdiyi Abbas Hüseynova Qobustan həbsxanasında işgəncə verilməsi haqda yalan məlumat yayıb. Bu il fevralın 22-də Gəncə İnzibati-İqtisadi Məhkəməsi iş üzrə yekun qərar çıxarıb və İmanovun vəkillik fəaliyyətinə xitam verib.