GancaPost saytı xəbər verir ki, Mərkəzi Seçki Komissiyasına (MSK) daha 5 partiya 2019-cu il üzrə maliyyə hesabatı təqdim edib.

Bunlar Vəhdət Partiyası, Azərbaycan Kəndli Partiyası, Azərbaycan Demokrat Partiyası, Azərbaycan Ümid Partiyası və Vahid Azərbaycan Milli Birlik Partiyasıdır.

Beləliklə, 2019-cu il dekabrın 31-dək dövlət qeydiyyatından keçmiş 55 partiyadan 40-ı maliyyə hesabatını təqdim edib.

Qeyd edək ki, qanunvericiliyə əsasən, siyasi partiyalar illik maliyyə hesabatlarını auditor rəyi ilə birlikdə aprelin 1-dən gec olmayaraq MSK-ya təqdim etməlidir. Mərkəzi Seçki Komissiyası aprelin 1-dək illik maliyyə hesabatlarını auditor rəyi ilə birlikdə təqdim etməyən siyasi partiyalar barədə Ədliyyə Nazirliyinə məlumat verməlidir.

Xatırladaq ki, bu il Azad Demokratlar Partiyası, Yeni Zaman Partiyası, Cümhuriyyət Xalq Partiyası və Müstəqil Xalq Partiyası dövlət qeydiyyatına alınıb və dövlət qeydiyyatına alınan partiyaıarın sayı 59-a çatıb. Ancaq 2019-cu ildə rəsmi olaraq qeydiyyatda olmadıqları üçün bu dörd partiya 2019-cu il üzrə maliyyə hesabatı verməyəcək.