"Mən bu gün burada Gürcüstandakı azlıqların səsiyəm".

GancaPost.info gürcü mediası 24news.ge portalına istinadən xəbər verir ki, bu sözləri Acariya bölgəsindən seçilən müstəqil millət vəkili Tariel Nakaidze, parlamentin növbədənkənar plenar iclasında çıxışı zamanı qeyd edib.

Onun sözlərinə görə, Gürcüstanda yaşayan azlıqları ikinci dərəcəli vətəndaş kimi qeyd etmək və onları yalnız təhlükəsizlik baxımından nəzərdən keçirməyə icazə verilməyəcək:

"Mən "Pələng Dərisi Geyinmiş Pəhləvan" əsərinin qəhramanı Tarielin adını daşıyıram. Mən böyük gürcü atalarının Memed bey Abaşidze, Selim bey Ximşiaşvili, Gulo ağa Kaikaçişvili, Sayat Nova, İlya Çavçavadze və azərbaycanlı qadın, Pərixanım Sofiyevanın törəməsiyəm. Pərixanım Sofiyeva 100 il bundan öncə demokratik Gürcüstanın müstəqillik və şərəfini qoruyub".

"Mən bu gün burada Gürcüstandakı azlıqların səsiyəm. Mən bir Gürcüstan müsəlmanıyam, yaxşı bilməyinizi istəyirəm cənab Baş nazir, mən bir Gürcüstan müsəlmanıyam. Biz məscidlər tikəcəyik, kilsələr tikəcəyik, sinaqoqlar tikəcəyik. Azad, müstəqil və rəngarəng Gürcüstan quracağıq, çünki bizim üçün bu mənəviyyatın əsas məbədidir. Mən suallarımızın üzərindən keçməyinizə icazə verməyəcəyəm, suallarımızı cavablandırmalısınız. Gürcüstanda yaşayan azlıqları ikinci dərəcəli vətəndaş kimi qeyd etmək və onları yalnız təhlükəsizlik baxımından nəzərdən keçirməyinizə icazə verməyəcəyəm. Gürcüstan bizim vətənimizdir, bizim başqa vətənimiz yoxdur!", - deyə T. Nakaidze bildirib.

Qeyd edək ki, Pərixanım Sofiyeva (1884-1953) 1918-ci ildə Gürcüstan Demokratik Parlamentinə Tiflis qəzasının Qarayazı dairəsindən bitərəf deputat seçilib. O, müsəlman dünyasının ilk qadın millət vəkili kimi tarixə düşüb.