"Nəticələr onu göstərir ki, "Gürcü Arzusu" partiyası illərdir etdiyi saxtaxarlığı təkrarladı. Bu partiya Marneulidə demokratiyanı dəfn etdi".

GancaPost xəbər verir ki, bu sözləri gürcü mediası 24news.ge portalına müsahibəsində "Avropalı Gürcüstan" partiyasının Marneuli namizədi Əhməd İmamquliyev deyib.

O bildirib ki, Marneulidə keçirilən seçkilərdə insanların səsləri oğurlanıb.

"Mən Zaur Darğallını təbrik etmirəm. İnsanların səsləri oğurlanıb. Amma biz bu insanlarla demokratiya uğrunda mübarizəmizi sona qədər davam etdirəcəyik", - deyə Əhməd İmamquliyev vurğulayıb.

Qeyd edək ki, Gürcüstan Mərkəzi Seçki Komissiyası Marneuli rayonunda 90 seçki məntəqəsi üzrə nəticələri elan edib.

Nəticələrə görə, hakim "Gürcü Arzusu" partiyasının namizədi Zaur Darğallı səslərin 78,6%-ni əldə edərək Marneulinin yeni meri seçilib.

Mixeil Saakaşvilinin lideri olduğu müxalif "Vahid Milli Hərəkat" Partiyasının namizədi Aqil Mustafayev 11,49%,

Gürcüstanın eks spikeri David Bakradzenin sədri olduğu müxalif "Avropalı Gürcüstan" partiyasının namizədi Əhməd İmamquliyev 7,54%,

Müstəqil namizəd Əli Bədirov isə 1,21% səs toplayıb.

Qeyd edək ki, ötən gün Marneulidə keçirilmiş seçkilərdə rayon rəhbəri vəzifəsi uğrunda 15 namizəd mübarizə aparıb. Rayonda seçici fəallığı 35,82% təşkil edib.