-- Adversting 9 --
-- Adversting 10 --
-- Adversting 1 --

Gəncə sakini: Rəsulzadənin heykəli olan parkın abadlaşdırılmasını istəyirik

“Rəsulzadənin heykəli olan parkı zibilliyə döndərib, gediblər. Ağacları kəsiblər, bu, bir tərəfə, üstəlik, parkı da bərbad vəziyyətə salıblar".

14:10:23 | 2020-02-10

“İri texnikalar gətirib, parkın içində azı 10 ağacı kəsib getdilər. Mane olmağa çalışsaq da, əlimizdən heç nə gəlmədi”.

Gəncədə “Dəmiryolçular Parkı” kimi tanınan, dəmiryolu yaxınlığında yerləşən parkda ağaclar kəsilib. Bu barədə həmin ərazidə yaşayanlar danışıb. Sakinlərin iddiasına görə, yerli Ekologiya şöbəsi parkda təxminən 10 ağac kəsib. Onlar kəsimin qarşısını almaq istəsələr də, bacarmayıblar.

“Əvvəllər baxımlı park idi, indisə...”

Parkın yaxınlığında yaşayan və ərazidən istirahət üçün istifadə edən sakin Kamil Qasımov deyir, eyni parkda əvvəllər də dəfələrlə ağac kəsimi baş verib:

“Bu park əvvəllər çox baxımlı idi. İnsanlar burada istirahət edirdi, ərazidə Məmməd-Əmin Rəsulzadənin heykəli də var. Ancaq neçə ildir ki, vaxtaşırı ağacları 5-5, 10-10 kəsirlər, yerinə ağac əkmirlər. Məsələn, bu dəfə kəsdikləri də həmişəyaşıl ağaclar idi. Məqsədləri nədir, bilmirik. Sadəcə, qorxduğumuz odur ki, sabah biri ortaya çıxıb burada obyekt tikməyə başlasa, necə ki, ağac kəsiminin qarşısında aciz qalmışıq, obyekt tikintisinin də qarşısını ala bilmərik. İstədiyimiz odur ki, əvvəllər olduğu kimi, parkda skamyalar, uşaqlar üçün oyun meydançaları quraşdırılsın, əhali istifadə etsin. Bütün bunlar əhalinin haqqıdır, çünki ətrafda nə varsa, hər şey bizdən toplanan vergilər hesabınadır”.

Gəncə sakini Samir Vəliyev deyir, illərdir ki, bu ağac kəsimi “ənənəsi” şəhərin hər yerində davam edir:

“Gah Yaşıllaşdırma İdarəsi hansısa küçədə ağaclara “divan tutur”, gah Ekologiya Şöbəsi... Ağacları 5-5, 10-10 kəsirlər, kütləvi kəsmirlər ki, diqqəti çəkməsin, bir də baxırsan ki, 2-3 il ərzində parkın bir hissəsi bomboş qalıb, yerində obyekt tikilir. İndi də məqsədlə nədir, dəqiq bilmirik, bircə onu bilirik ki, sağlam ağacı kəsmək məqsədsiz olmur”.

Samir Vəliyev deyir, ağacları kəsməkdənsə, parkda səliqə-səhman yaradılsa, daha faydalı olar

“Parkı zibilliyə döndərib, gediblər”

“Ağacları kəsiblər, bu, bir tərəfə, üstəlik, parkı da bərbad vəziyyətə salıblar. Sizə fotolar göndərmişik, parkın durmuna baxın... Neçə gündür ki, ağaclar kəsilib, parkı zibilliyə döndərib gediblər, heç tökdüklərini də təmizləməyiblər. Neçə gündür ki, adamlar parkın içindən keçə bilmir. Tələb edirik ki, o park abadlaşdırılsın, orda Məmməd-Əmin Rəsuzadənin heykəli var. Parkın zibillik içərisində saxlanması onun ruhuna da hörmətsizlikdir”, - Samir Vəliyev deyir.

Sakinlər deyir, ağaclar quru olduğuna görə kəsilsəydi, yerinə yeniləri əkilərdi, ancaq əkilmiyib.

Rəsmi qurum: “Kəsilmiş ağacların yerinə yeniləri əkiləcək”

Məsələ ilə bağlı Meydan TV Gəncənin Ekologiya Şöbəsi ilə əlaqə saxlaya bilməsə də, məsələyə Gəncə Şəhər İcra Hakimiyyətindən münasibət öyrənə bilib. Qurumdan bildirilib ki, fevralın 2-də 10 saylı Gəncə Ərazi Ekologiya və Təbii Sərvətlər Şöbəsi tərəfindən budama işləri aparılarkən Zülfü Hacıyev 69 ünvanı yaxınlığındakı parkda qurumuş təxminən 5 ağac aktlaşdırılıb və kəsilib. Gəncə sakini olan Kamil Qasımov ağac kəsimi ilə bağlı müvafiq qurumlara şikayət edib. Fevralın 7-də yerli Ekologiya Şöbəsinin əməkdaşları həmin vətəndaşla birlikdə ağacların kəsildiyi ərazidə olublar. Vətəndaşa ağacların kəsilmə səbəbləri izah edilib və aktla tanış olub. Ona kəsilmiş ağacların yerinə yeni ağacların əkiləcəyi ilə bağlı məlumat verilib.


ETİKET :  

Daha Çox