GancaPost.info xəbər verir ki, saytın təqdimat mərasimində Gəncə şəhər İcra Hakimiyyətinin başçısı Niyazi Bayramov, Türkiyənin Gəncədəki Baş Konsulu Zeki Öztürk, Millət vəkili Naqif Həmzəyev və şəhər ziyalıları iştirak ediblər. Tədbirin əvvəlində Vətən uğrunda canından keçmiş şəhidlərimizin ruhu bir dəqiqəlik sükutla yad edilib.

Gəncə Şəhər İcra Hakimiyyətinin başçısı Niyazi Bayramov çıxış edərək, Azərbaycan Respublikasının ərazi bütövlüyü uğrunda canından keçmiş şəhidlərimizin əziz xatirəsinin daim uca tutulduğunu bildirib. O, qeyd edib ki, şəhid ailələri dövlətin diqqət və qayğısı ilə əhatə olunublar. Canını Vətən uğrunda qurban verən igid oğullarımızın xatirəsinin yaşadılması və onların tanıdılması isə hər bir azərbaycanlının borcudur. Bu baxımdan yeni yaradılan sayt Azərbaycanda bir ilk olaraq, xüsusi əhəmiyyət kəsb edir.

Daha sonra Gencesehidleri.az saytı haqqında tədbir iştirakçılarına ətraflı məlumat verilib. Qeyd edilib ki, sayt Gəncə şəhər İcra Hakimiyyətinin təşəbbüsü, "Zaferoğlu İnşaat"ın dəstəyi ilə "Netqraf Group" tərəfindən hazırlanıb. Layihənin əsas məqsədi Vətən uğrunda canından keçmiş şəhidlərimizin əziz xatirəsini yaşatmaqla, onları tanıtmaqdır. Sayt Gəncənin I Qarabağ Müharibəsi, Vətən Müharibəsi, mülki və digər şəhidləri barədə məlumatları vahid platformada toplayır. Burada ümumilikdə 600-ə yaxın şəhid barədə məlumat yerləşdirilib.

Saytda "Xatirə dəftəri" bölməsi də mövcuddur. Şəhidin ailə üzvləri, yaxınları, sinif, tələbə, iş və döyüş yoldaşları sözügedən bölməyə daxil olaraq, şəhid barədə öz xatirələrini oxucularla bölüşə bilərlər.

"Zaferoğlu İnşaat"ın rəhbəri Zəfər Məmmədov qeyd edib ki, layihənin davamı olaraq, Gəncənin Şəhidlər xiyabanındakı şəhid məzarlarının üzərinə QR kodlar yerləşdiriləcək. Şəhidlər xiyabanını ziyarətə gələnlər öz telefonlarını həmin QR kodların üzərinə tutaraq sayta keçid edə və şəhid haqqında ətraflı məlumat ala biləcəklər ki, bu da Respublika üzrə bir ilk olacaq.

Təqdimat mərasimində çıxış edən teatrşünas-tənqidçi Anar Bürcəliyev saytın yaradılmasını Vətən uğrunda canından keçən igid oğullarımıza və şəhid ailələrinə göstərilən diqqətin bariz nümunəsi kimi qiymətləndirib. O, qeyd edib ki, şəhid ailəsi olaraq hər zaman dövlətin və şəhər rəhbərliyinin qayğısını hiss edilər. Layihənin həyata keçirilməsində əmək sərf edən hər kəsə öz minnətdarlığını çatdırıb.

Tədbirdə Türkiyənin Gəncədəki Baş Konsulu Zeki Öztürk, Millət vəkili Naqif Həmzəyev və digərləri çıxış edərək, yeni yaradılan saytın şəhidlərimizin ölkə və dünya miqyasında tanıdılması baxımından önəm kəsb etdiyini bildiriblər. Həmçinin, vurğulanıb ki, Azərbaycan xalqı həm I Qarabağ, həm də 44 günlük Vətən müharibəsi zamanı şəhid olanları heç vaxt unutmayacaq, onların xatirəsi daim uca tutulacaqdır.

Qeyd edək ki, Gəncə şəhəri I Qarabağ Müharibəsində 90 nəfəri itkin olmaqla 467, 44 günlük Vətən müharibəsi dövründə isə 86-sı hərbi, 26-sı mülki olmaqla, 112 şəhid verib.