Gəncə şəhər sakini Elçin Məmmədov məhkəmə icraçılarının ondan qeyri-qanunu formada ödəniş tələb etdiyini iddia edir.

GancaPost saytı xəbər verir ki, şikayətçi "Qafqazinfo"ya müraciətində bildirib ki, 2014-cu ildə "Bank of Baku"dan 7 min manat kredit götürüb.

Daha sonra gecikmələr olduğu və aylıq məbləği ödəyə bilmədiyi üçün Prezidentin 28.02.2019-cu il tarixli fərmanına uyğun olaraq, krediti restrukturizasiya edilərək qapanma müddəti 5 illik uzadılıb. Bununla da aylıq ödənişi azaldılaraq 83 manat təyin olunub:

Banklar bu fərmandan sonra krediti 1 faizlə 5 illik uzatdığı halda Ədliyyə Nazirliyinin Məhkəmə icraçıları 7 faizlə pul mənimsəyirlər.

Gəncə şəhər Məhkəmə İcraçılarının rəisi Nizami Qocayev bildirir ki, bu qərarı Ədliyyə Nazirliyinin Baş İcra İdarəsi verib. Hər yerə müraciət etmişəm, bu prosesin qanunsuz olduğunu düşünürəm".

Hüquqşünas Tural Şükürov vətəndaşın müraciəti ilə bağlı açıqlamasında bildirib ki, kreditin ödənilməsində icraçıların rolu olubsa, proses qanunauyğun formada aparılıb:

"İcra haqqında qanunun 78-ci maddəsinə görə, banka könüllü ödəniş edilmədiyi təqdirdə icra məmuru borcludan tutulmalı pul məbləğinin 7 faizi həcmində icra ödənişinin alınması barədə qərar qəbul edir. İcra ödənişinin məbləğinin 25 faizi dövlət büdcəsinə, qalan hissəsi isə icra xidməti olaraq icra məmurlarının xüsusi fonduna köçürülür".