"Gəncə şəhərinin Nizami və Kəpəz rayonları inzibati ərazi bölgüsünün ləğv edilməsi və idarəçiliyin şəhər administrasiyasında cəmləşməsi əhalinin sosial-mədəni və məişət ehtiyaclarının ödənilməsi və qanunçuluğun təmin edilməsi ilə bağlı qərarların icrasının səmərəliliyini daha da artıracaq. Bu yolla həm də büdcə vəsaitlərinin sərfiyyatına qənaət olunacaq".

GancaPost.info xəbər verir ki, bu sözləri iqtisadçı alim, millət vəkili Vüqar Bayramov Gəncə şəhərinin Nizami və Kəpəz rayonları inzibati ərazi bölgüsünün ləğv ediləcəyi barədə məlumatı axar.az-a şərh edərkən deyib.

Onun sözlərinə görə, Gəncə şəhəri Nizami və Kəpəz rayonları inzibati ərazi bölgüsünün ləğv edilməsi ilə bağlı irəli sürülən təşəbbüsdə məqsəd ölkənin ikinci böyük şəhərində idarəetmənin keyfiyyətinin yüksəlməsi və vətəndaşların rahatlığının, məmnunluğunun təmin edilməsidir:

"İnzibati-struktur islahatlarının davam etməsi bütövlükdə idarəetmə aparatının optimallaşmasını hədəfləyir. Eyni zamanda yerli səviyyədə kadr islahatlarının aparılması, yerli icra hakimiyyəti başçılarının gənclərdən təyin edilməsi islahatların effektivliyini artırır. Nəzərə alaq ki, həm sosial, həm də mərkəzi idarəetmə orqanlarında aparılan islahatlar bir çox qurumların birləşməsinə səbəb oldu. Biz bunu əvvəlki illərdə də müşahidə etmişik.

Yerli icra hakimiyyəti orqanlarının fəaliyyətinin təkminləşdirilməsi bölgələrə investisiyanın cəlb ediməsi baxmından da çox vacibdir. Ölkə başçısı da bir müddət əvvəl regionlara yerli və xarici investisiyanın daha çox cəlb edilməsi ilə bağlı göstərişlər verdi. Bu baxımdan gözlənilir ki, aparılan kadr və struktur islahatlarının davamı olacaq. Bu, eyni zamanda, bürokratik əngəllərin aradan qaldırılmasına gətirib çıxarır. Belə ki, vətəndaşların müraciətlərinə baxılma mexanizmi sadələşdiriləcək, onların problemləri daha çevik şəkildə həll olunacaq. İdarəetmə sistemində çoxpilləlilik, paralellik, təkrarçılıq, bürokratiya, süründürməçilik və digər bu kimi neqativ hallar aradan qaldırılacaq".