Gəncə şəhərində tarixi arxitekturalı yaşayış binası dağılır. Tikilinin bir hissəsi uçub, digər hissəsi və zirzəmisi qalıb.

Tarixi 1909-cu ilə dayanan unudulmuş, yarıuçmuş tikili Gəncənin mərkəzi küçələrindən biri olan Cavadxan küçəsi 79 ünvanında yerləşir.

GancaPost xəbər verir ki, 11 il əvvəl - 2008-ci ilin avqust ayında binanın Qara Qarayev küçəsinə tərəf olan yan divarının bir hissəsi tamamilə uçub. Uçmuş binaya Fövqəladə Hallar Nazirliyi və Şəhər Fövqəladə Hallar Komissiyasının əməkdaşları tərəfindən birgə baxış keçirilərək akt tərtib olunub. Akta əsasən, binanın qəzalı vəziyyətə düşməsinə səbəb fiziki cəhətdən aşınmaya məruz qalması olub.

Binada yaşayan 4 ailənin təhlükəsizliyinin təmin edilməsi üçün həmin ildən ailələr təxliyə edilib.

Qeyd edilən binaya 2018-ci ilin mart ayında aidiyyatı qurumlar tərəfindən təkrar baxış keçirilərək qəzalı vəziyyətdə olması barədə yenidən akt tərtib olunub.

Məlumata görə, binanın zirzəmisi özəldir. Zirzəminin sahibkarı tərəfindən mənzil sahiblərinə evlərin satılması təklif olunsa da, ümumi razılıq əldə edilməyib.

Binanın isə nə vaxt təmir olunacağı və ya uçurularaq yerində yeni yaşayış binasının tikiləcəyi məlum deyil.