Gəncə hadisələrinə görə həbs olunan şəxslərin işi bir neçə qrupa ayrılıb. Onların əksəriyyətinin işi məhkəməyə göndərilib. Hətta iki qrupa artıq hökm də oxunub. Onlar isə hökmdən narazı qalaraq Apellyasiya şikayəti veriblər. Gəncə Apellyasiya Məhkəməsinin hakimləri Bakı Apelyasiya Məhkəməsində onların şikayətinə baxırlar.

İyunun 4-də Bakı Apellyasiya Məhkəməsinin binasında hakim Çingiz Məmmədovun sədrliyilə 11 nəfərlik qrupun şikayətlərinə baxılıb. Gəncə Ağır Cinayətlər Məhkəməsinin hökmüylə onlara 7 il 6 aydan 9 ilə qədər həbs cəzası verilib.

Budəfəki məhkəmə iclasında təqsirləndirilən 11 nəfərdən 4-ü - Toğrul Verdiyev, Seymur Əliyev, Orxan Yağnaliyev və Vaqif Əşrəfov ifadə verib. Çıxışçılar özlərini təqsirli bilməyərək, onlara qarşı irəli sürülən ittihamları qəbul etmədiklərini bildiriblər.

Növbəti proses iyun ayının 24-ü saat 14:30-da Bakı Apellyasiya Məhkəməsində keçiriləcək.

Qeyd edək ki, bu qrupa fevralın 22-də hökm oxunub. Gəncə Apellyasiya Məhkəməsinin hakimi Natiq Əliyevin sədrliyilə çıxarılan hökmə əsasən, 11 nəfərdən Araz Həsənov və Vaqif Əşrəfov 7 il 6 ay, Toğrul Verdiyev, Kamal Məhərrəmov, Nizami Əkbərov, Şahlar Rzayev, Tural Bayramov, Seymur Əliyev və Ruslan Həsənov 8 il, Orxan Yağnaliyev 8 il 6 ay, Maarif Hacıyev isə 9 il azadlıqdan məhrum edilib.