Gəncə şəhər Baş Polis İdarəsinin əməkdaşları şəhər ərazisində tibbi maskadan istifadə etməyən şəxlərə qarşı reyd keçirib.

GancaPost.info-nun məlumatına görə, reyd zamanı açıq havada ictimai yerlərdə tibbi maskadan istifadə etməyən şəxslər saxlanılıb, onlara qanunvericiliyin tələbləri izah olunub və inzibati qaydada cərimə olunublar.

Yoxlamalar zamanı mikroavtobusla rayonlararası sərnişin daşıyanlara da rast gəlinib. Qanunsuz fəaliyyət göstərən nəqliyyat vasitələrinin istismarı dayandırılıb, sürücüləri barəsində inzibati qaydada tədbir görülüb.

Xatırladaq ki, Nazirlər Kabineti yanında Operativ Qərargahın noyabrın 19-da imzaladığı qərara əsasən, 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunub. Bununla da, maskalardan istifadə qaydalarına nəzarət rejimi daha da sərtləşdirilib.

Qeyd edək ki, İnzibati Xətalar Məcəlləsinin 211.2-ci maddəsinə əsasən, epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə fiziki şəxslər 100 manat məbləğində, vəzifəli şəxslər 200 manat məbləğində, hüquqi şəxslər 400 manat məbləğində cərimə edilir. Həmin xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən 1 il ərzində təkrar törədilməsinə görə fiziki şəxslər 200 manat məbləğində, vəzifəli şəxslər 400 manat məbləğində, hüquqi şəxslər 800 manat məbləğində cərimə edilir.