"Bu kəhrizin bərpası bir tarixi-mədəni abidə olmaq etibarı ilə qorunması baxımından çox önəmlidir"

GancaPost.info xəbər verir ki, bu sözləri Milli Məclisin Mədəniyyət Komitəsinin sədri Qənirə Paşayeva bildirib.

"Bu günlərdə Gəncə şəhərindən bir qrup ziyalının müraciəti əsasında Gəncə şəhər İcra Hakimiyyətinə məktubla müraciət edərək, Hacı Mir Qasım Ağanın 1914-cü ildə Gəncəyə çəkdirdiyi kəhrizin bərpa olunması məsələsinə baxmağı xahiş etmişdik.

Gəncə şəhər İcra hakimiyyətinin başçısı Niyazi Bayramovla telefon danışığımızda, hörmətli başçı məsələnin araşdırıldığını və gərəkən addımların atılacağını bildirdi.

Hesab edirəm, bu kəhrizin bərpası, həm şəhərdə içməli su üçün həm də, bir tarixi-mədəni abidə olmaq etibarı ilə qorunması baxımından çox önəmlidir.

Qeyd edək ki, Hacı Mirqasım ağa kəhrizi 1914-cü ildə başlanğıcını Qızıl qayadan götürüb El yolu ilə gəlməklə tikilib. Gəncənin keçmiş İcra başçısı Elmar Vəliyevin dövründə adı çəkilən Kəhriz bulağının gözü bağlanaraq ləğv edilib. Ümumiyyətlə, Elmar Vəliyevin dövründə Hacı Mir Qasım Ağa kəhrizi, 20 Yanvar Şəhidlərinin xatirəsinə olan ehsan bulağı, Gəncə Dövlət Kukla Teatrının, 1 saylı orta məktəbin qarşısındakı bulaq eləcə də "Xan Bağı"nın qarşısındakı olan bulaq tamamilə ləğv olunub.