GancaPost.info xəbər verir ki, Gəncə şəhər Statistika İdarəsindən verilən məlumata görə, Gəncə şəhər əhalisinin sayı ilin əvvəlindən 158 nəfər artaraq 2021-ci il iyul ayının 1-i vəziyyətinə 335 min 960 nəfərə çatıb. Əhalinin 48,8 faizini kişilər, 51,2 faizini isə qadınlar təşkil edir.

Ədliyyə Nazirliyinin Gəncə şəhər Qeydiyyat şöbələri tərəfindən cari ilin altı ayı ərzində şəhərdə 1279 nəfər doğulan körpə qeydə alınmış, doğulanların 52,5 faizi oğlan, 47,5 faizi isə qız uşaqlarıdır. Körpələrdən 15-i əkiz doğulanlardır.

2021-ci ilin yanvar-iyun ayları ərzində şəhərdə 1231 ölüm halı, 671 nikah və 357 boşanma halları qeydə alınıb.

Bu ilin yanvar-iyun aylarında Daxili İşlər Nazirliyi və Dövlət Miqrasiya Xidmətinin Gəncə şəhərindəki müvafiq qurumları tərəfindən daimi yaşamaq üçün şəhərə 241 nəfər gələn, 131 nəfər şəhərdən gedən qeydə alınmışdır. Şəhər üzrə miqrasiya saldosu 110 nəfər təşkil edib.

Qeyd edək ki, şəhərdə məskunlaşan məcburi köçkünlər şəhər əhalisinin daimi sayına daxil edilmir.