Kəlbəcər rayonunun işğaldan azad olunmasını Gəncə şəhəri ərazisində məcburi köçkünlər üçün salınmış qəsəbədə sevinclə qarşılanıb. Şəhərin bir çox küçə və prospektlərində insanlar Kəlbəcərin işğaldan azad olunması münasibəti ilə avtoyürüşlər keçiriblər.
Gəncə şəhəri ərazisində Kəlbəcərdən olan məcburi köçkünlər "Qarabağ Azərbaycandır!", "Kəlbəcər bizimdir!", "Yaşasın Ali Baş Komandan!" şüarları ilə küçələrə axışaraq Azərbaycanın Dövlət Bayrağını dalğalandırırlar. Şəhərin küçə və prospektlərində avtoyürüşlər keçirilir.

Qeyd edək ki, noyabrın 10-da Azərbaycan və Rusiya Prezidentlərinin, Ermənistanın baş nazirinin imzaladığı birgə Bəyanata əsasən, Ermənistan silahlı qüvvələrinin birləşmələri Kəlbəcər, Laçın və Ağdam rayonlarının ərazilərini qeyd-şərtsiz tərk etməlidir. Kəlbəcər rayonu noyabrın 15-də Azərbaycana qaytarılmalı idi, lakin Ermənistan tərəfinin müraciəti əsasında Rusiya dövlətinin xahişi ilə sonradan Ermənistana Kəlbəcəri təhvil vermək üçün 10 gün əlavə möhlət verildi. Noyabrın 25-də isə rayon işğaldan azad olundu.