Gəncə şəhəri, Kəpəz rayon Cavadxan qəsəbəsində yerləşən zibil poliqonu gecə saatlarında yanır. Bununla bağlı şəhər sakinləri dəfələrlə sosial şəbəkələrdə məlumat paylaşıblar.

Dövlət Ekoloji Təhlükəsizlik Xidmətinin əməkdaşları tərəfindən Gəncə şəhərində monitorinqlər keçirilib.

Atmosfer havasının keyfiyyətinə nəzarət tədbirləri çərçivəsində Sumqayıtla yanaşı, Quba və Gəncə şəhərlərində yerləşən müəssisələrdə də havanın tərkibi yoxlanılıb.

Dövlət Ekoloji Təhlükəsizlik Xidmətinin rəisi Hikmət Əlizadə bildirib ki, monitorinqlər zamanı Gəncə şəhərində gecə saatlarında havada xoşagəlməz tüstü və qoxu müşayiət edilib. Aparılan araşdırma zamanı Gəncə məişət tullantıları poliqonunda tullantıların istidən öz-özünə alışdığı və nəticədə havaya normadan artıq tüstünün atıldığı məlum olub. Belə halların təkrarlanmaması üçün poliqon rəhbərliyinə məcburi göstəriş verilib.

Dövlət Ekoloji Təhlükəsizlik Xidmətinin rəisi Hikmət Əlizadə açıqlamasında monitorinqlərin bütün regionlarda davam etdiyini bildirib və ətraf mühiti, havanı çirkləndirən subyektlərə bir daha xəbərdarlıq edib.
"İstehsalat müəssisələrinin sahiblərinin və ətraf mühitə zərərli təsir göstərən digər təsərrüfat subyektlərinin nəzərinə çatdırırıq ki, fəaliyyətlərini qanunamüvafiq həyata keçirsinlər, ətraf mühitin çirkləndirilməsinə şərait yaratmasınlar".