Gəncə şəhərinə ermənilər tərəfindən atılan raket zərbəsi şəhərdə təkcə dağıntılar törətmədi. İnsanların həyatına son qoyan bu terror həm də uşaqların acı xatirəsinə çevrildi. Terror hadisəsi nəticəsində 16 yaşlı Sevil və qardaşı 8 yaşlı Hüseyn valideynləri Anar Əliyev və Nurçin Əliyevanı itiriblər.

Hüseyn hadisə baş verəndə nənəsigildə olub. Qayıdanda isə evlərinin, nə də valideynlərinin orada olmadığını görüb.

16 yaşlı Sevil isə həmin gecə valideyinləri ilə birgə olub. 2 gün əvvəl Gəncəyə atılan raket onların binasına düşüb. Sevil bildirir ki, o, dağıntılar altında atasının səsini eşidib.

İndi bu uşaqlara qohumları sahib çıxacaq. Əmisi Yalçın Əliyev deyir ki, qardaşının balaları artıq onlara əmanətdir.

Qeyd edək ki, Ermənistan silahlı qüvvələrinin Gəncənin mərkəzi hissəsində yerləşən çoxmənzilli yaşayış binalarını raket atəşinə tutması nəticəsində Hüseyn və Sevil Əlizadələr, həmçinin körpə Nilay Əliyeva hər iki valideynini itirib. Ümumilikdə isə 10 nəfər ölüb, 34 nəfər yaralanıb.