Ermənistan yenə də Azərbaycanı təhdid etməyə cəhd göstərir. Belə ki, bu dəfə Ermənistan Azərbaycanı Gəncəyə zərbə endirmək təhdidinə cəhd edib.

GancaPost.info xəbər verir ki, məsələ ilə bağlı Azərbaycan Müdafiə Nazirliyi və Azərbaycan Xarici İşlər Nazirliyi (XİN) bəyanat yayıb.

Xatırladaq ki, bundan öncə də Ermənistan Azərbaycanı Mingəçevir SES-i vura biləcəkləri ilə təhdid edirdi.

Məsələyə münasibət bildirən "Atlas" Araşdırmalar Mərkəzinin rəhbəri, politoloq Elxan Şahinoğlu cebhe.info-ya açıqlamasında Ermənistana Azərbaycan Müdafiə Nazirliyinin cavab verməli olduğunu qeyd edib.

E.Şahinoğlu bildirib ki, Azərbaycan sərt ritorikasını artırmalıdır:

"Xarici İşlər Nazirliyinin elə uzun-uzadı bəyanatındansa, elə Müdafiə Nazirliyi 2 cümləlik sərt bəyanat yaysaydı daha effektli olardı. Digər tərəfdən Ermənistan yenə də təxribatla məşğuldur. Əvvəl deyirdilər ki, Mingəçevir SES-i vurarıq, indi də Gəncə vurmaqla təhdid edirlər. Sanki bizə psixoloji təzyiq etməyə çalışırlar. Gəncə təmas xəttinə yaxındır, Azərbaycan üçün müqəddəs və ikinci böyük şəhər olduğunu anladıqlarını və bu cür psixoloji təzyiq etmək niyyətindədirlər. Bunun cavabını da Müdafiə Nazirliyi verməlidir, Xarici İşlər Nazirliyi yox. Xarici İşlər Nazirliyi yenə də bəyanatda həmsədrlərə müraciət edib. Biz başa düşdük ki, bu həmsədrlər iş görə bilmirlər, faydasız təşkilatdır. Amma faydasız hesab etdiyimiz təşkilata hər dəfə müraciət etməyin nə mənası var? Müdafiə Nazirliyi sərt bir açıqlama verməli idi ki, Ermənistanın bütün şəhərlərini darmadağın edə bilərik. Biz hərbi ritorikanı artırmalıyıq. Ermənilərin bu təxribatına biz sərt şəkildə cavab verməliyik. Onsuz da bilirik ki, danışıqlar nəticə vermir. Ona görə də sərt ritorikanı gücləndirməliyik. Amma Xarici İşlər Nazirliyi həmsədrlərə müraciət edir. Bu günə qədər minlərlə belə müraciət olub, effekti varmı?"