Rusiyalı video-blogger İlya Varlamov dünyanın müxtəlif şəhərlərindən reportajlar təqdim etməsi ilə tanınır. Onun növbəti belə videosu Ermənistanın paytaxtı İrəvan şəhərindən olub. Reportajda maraq çəkən məsələ isə Aqnessa adlı erməni memarın dedikləridir. Bəlkə də ilk dəfədir ki, Ermənistanın özündə kimsə açıq şəkildə İrəvanda əvvəllər ermənilərin yaşamadığını deyir və həqiqəti deməkdən çəkinmir. Videoda İrəvanın mərkəzi hissəsində çəkiliş zamanı memar ermənilərin əvvəllər bu şəhərə yalnız alış-veriş üçün gəlib getdiklərini, digər millətlərlə müqayisədə azlıq təşkil etdiklərini deyir. Təəssüf ki, memar "digər" dedikdə azərbaycanlıların adını çəkmir. O, şəhərin sovet dövründə tamamilə yenidən erməni memar tərəfindən qurulduğunu deyir. Aydındır ki, burada söhbət İrəvanın xanlığına xas olan memarlıq nümunələrinin məhv edilib üzərində yeni şəhərin salınmasından gedir. Elə İ.Varlamov da videosunda İrəvanın heç tarixi mərkəzinin olmamasına diqqət çəkir.