İstanbula nəzarət Türkiyənin iqtidar partiyası AKP-nin əlindən çıxıb. Şəhərin mer seçkilərində müxalif CHP partiyasının namizədi Ekrem İmamoğlu qalib gəlib.

Bu qələbə prezident Recep Tayyip Erdoğana ağır zərbə hesab olunur.

Türkiyənin Yüksek Seçim Kurulu - Seçki Komissiyası sədrinin məlumatına görə, artıq bütün seçki qutuları açılıb və nəticəyə görə Ekrem İmamoğlu 54,21, Binalı Yıldırım isə 44,99 faiz səs toplayıb.

Sadri Güven bildirib ki, seçkilərdə iştirak 84,5 faiz olub.

İstanbulda keçirilən seçkilərin 23 iyun axşamı açıqlanmış ilkin nəticələrinə görə, CHP namizədi Ekrem İmamoğlu və AKP namizədi Binali Yıldırım arasındakı səs fərqi 700 mindən çoxdur.

Məlumata görə, Ekrem İmamoğlu səslərin 54,3 faizini, Binali Yıldırım isə 45,9 faizini qazanıb.

Anadolu Agentliyinin verdiyi xəbərə görə, seçki qutularının 99,37 faizi sayılıb. Məlumata görə, seçici fəallığı 84,42 faizdir.

Türkiyə Prezidenti Recep Tayyip Erdoğan Twitter hesabında Ekrem İmamoğlunu təbrik edib.

CHP lideri Kemal Kılıçdaroğlu deyib ki, "artıq CHP 82 milyonun partiyasıdır".

"CHP kimliyindən, inancından və həyat tərzindən ötəri heç kimi özgələşdirməyəcək. Hər kəsin inancına hörmət etmək lazımdır. Biz birlikdə sülh içində yaşamaq istəyirik. Biz heç bir uşağın ac qalmadığı bir ölkə istəyirik. Biz kişi və qadınlar arasında bərabərlik üçün mübarizə aparırıq. Hər evdə qazanın qaynadığı bir Türkiyə istəyirik. Türkiyə daxilində dinc və sülh içində olan bir Türkiyə inşa etmək istəyirik", o deyib.

HDP həmsədri Sezai Temelli də Ekrem İmamoğlunu təbrik edib.

İstanbulda bazar günü şəhər meri seçkisi çərçivəsində təkrar səsvermə keçirilib.

Türkiyə vaxtilə saat 17:00-da (18:00 Bakı vaxtilə) səsvermə məntəqələri bağlanıb.

Martın 31-də keçirilmiş səsvermənin nəticələri AKP namizədi Binali Yıldırımın verdiyi etiraza baxıldıqdan sonra Türkiyənin mərkəzi seçki qurumu tərəfindən ləğv edilmişdi və iyunun 23-də təkrar səsvermə keçirmək qərarı qəbul olunmuşdu.

CHP-nin namizədi Ekrem İmamoğluya verilən səslər martın 31-də keçirilmiş seçkiyə nisbətən bu günkü seçkidə artıb, cənab İmamoğlu 28 rayonda irəlidədir.

AKP namizədi Binali Yıldırım isə 11 rayonda irəlidədir.

Bu rayonlar Arnavutköy, Bağçılar, Başakşehir, Esenler, Gaziosmanpaşa, Güngören, Kağıthane, Pendik, Sultanbeyli, Sultangazi və Ümraniyedir.

Cənab İmamoğlu 31 martda səsvermədə geridə olduğu 12 rayonda, Bahçelievler, Bayrampaşa, Beykoz, Beyoğlu, Çekmeköy, Eyüpsultan, Fatih, Gaziosmanpaşa, Sancaktepe, Şile, Tuzla ve Üsküdarda indi liderlik edir.

İlkin nəticələr açıqlandıqdan sonra, Binali Yıldırım Ekrem İmamoğlunu təbrik edib.

Ekrem İmamoğlu səsvermənin ilkin nəticələrindən sonra açıqlama verib.

"Biz Türkiyədə demokratiya saatının mükəmməl işləməyinin tərəfdarıyıq. Təəssüf ki, bu, 31 mart axşamı işləməmişdi. Millətimiz baş verən hər şeyi bilir. Anaq saatı dayandırmaqla vaxtı da dayandıra bilməzsiz.Bu gün seçki qutularından səs bülletenlərilə yanaşı hesab bülletenlərinin də çıxdığını demək istəyirəm. Vətəndaşlar baş vermiş böyük ədalətsizliklə hesablaşıblar. Bu, bir səhifənin bağlanması, digərinin açılması demək deyil, hər kəsin yeni və ümumi bir səhifə açması, yeni bir başlanğıc deməkdir", o bildirib.

Cənab İmamoğlu "heç kimi ayırmadan, özgələşdirmədən" çalışacağını da qeyd edib.

"İnsanlar mənə yoxsulluqla mübarizə, yaşıl sahələrin və ucuz nəqliyyatın üçün səfərbərlik başlatmaq kimi müqəddəs bir missiya verdi. Bu ən şərəfli bir vəzifədir. Bu vəzifəni lazımınca yerinə yetirməkdən başqa bir prioritetim yoxdur", o deyib.