Siyasi şərhçi Azad İsazadə "BakuPost"a bildirdi ki, hələ döyüşlər başlamamışdan əvvəl, bəzi erməni rəsmiləri və ekspertləri Gəncənin, Mingəçevirin adlarını dəfələrlə səsləndirdilər:

"Birinci Qarabağ müharibəsində bu addıma əl atmadılar. İndi aciz vəziyyətdə olduqları, heç nəyə əlləri çatmadığı üçün edirlər. Ancaq belə zərbələrlə çalışırlar Azərbaycanda əhali arasında çaxnaşma, təşviş yaratsınlar. İkincisi, Azərbaycanı cavab atəşi açmaqla təxribata təşviq etmək istəyirlər. Yadınızdadırsa, onlar Gəncəni və Mingəçeviri dedikdə, cavab olaraq, biz də Naxçıvandan İrəvanı vuracağımızı dedik. İndi Ermənistan ərazisini, mülki əhalinin yaşadığı yerləri vurmağa məcbur edirlər. Guya beynəlxalq səviyyədə göstərsinlər ki, baxın, azərbaycanlılar bizə nə edirlər. Beləcə, Rusiyanı da döyüşlərə cəlb etmək istəyirlər. Amma ən önəmli, əsas fakt acizlikləridir. Yəni bunu əlləri heç yana çatmır deyə edirlər. Ermənistan əhalisinə nəsə etdiklərini göstərmək istəyirlər. Gəncə zərbəsindən sonra Qarabağın qondarma prezidenti boynuna aldı ki, atəş əmrini o verib. Halbuki onun belə bir səlahiyyəti yoxdur. Faktiki olaraq, bütün zərbələrin Ermənistan ərazisindən gəldiyi sübut edildi".