44 günlük Vətən müharibəsi tariximizə böyük hərflərlə yazıldı. Azərbaycan xalqı bu müharibədən alnı açıq, üzü ağ çıxdı, zəfər, qələbə qazandı. Döyüş meydanında qazandığımız qələbəyə görə xalqımız ordumuza, igid zabit və əsgərlərimizə, canını Vətən yolunda fəda edən şəhidlərimizə borcludur. O şəhidlərə ki, meydanda əsl qəhrəmanlıq göstərib, yeni dastanlar yazdı. Qəhrənamlıq simvolu Şəhidlər - bu günümüzün qeyrət salnaməsi, sabahımızın örnək timsalıdırlar.

Qısa ömrünü Vətən uğrunda fəda edərək Azərbaycanın ən yeni tarixinin bu qeyrət salnaməsini qanı ilə yazanlardan biri də Kərim Namil oğlu Məmmədovdur.

Kərim doğulduğu gündən şəhidliyə yol gedirdi. Uca Tanrı igidlərin içərisindən seçdiyi bəndələrindən biri kimi onu da önə çəkdi, əyninə şəhidlik libası biçdi. Kərim qəlbinin istəyi ilə fədakar bir ömrə yolçuluq etdi. Bu mübariz İnsan şərəfli bir həyat yaşadı... fani dünyada ömrünün bitdiyi andan əbədiyaşarlığa qovuşdu....

Kərimin həyat hekayəsini qələmə almaq üçün Məmmədovlar ailəsinin Gəncənin mərkəzi küçələrindən birində yerləşən, darvazasında Azərbaycan və Türkiyənin qoşa bayraqları asılmış mənzilinə baş çəkdik. Qapını şəhidin həyat yoldaşı Əfsanə xanım açdı. Sonra isə qabağımıza şəhidin gül üzlü balaları - 7 yaşlı Zeynəb və 5 yaşlı Hüseyn qaçdı. Hüseyn böyüklərə xas təmkinlə bizimlə salamlaşdı, Zeynəb isə dil boğaza qoymadan danışmağa başladı: "Hüseyn anama oxşayır, mənim gözüm, qaşım atama oxşayır". Balaca Zeynəb atasına oxşadığına görə fəxr edirdi, sanki özünü göylərin yeddinci qatında hiss edirdi. Zeynəbin sözündən, söhbətindən doymaq çətin idi, danışdıqca atasına oxşayan gözləri par-par yanırdı.

Zeynəbin hay-küyünə, şən gülüşlərinə Kərimin anası Zərifə xanım da həyətə çıxdı. Gözləri hərbçi oğlunun yolunu gözləməkdən yorulmuş, 44 gün ərzində atılan hər güllə səsindən səksənmiş ana məğrur dayanmışdı. Məqsədimizin Kərimin həyat tarixçəsini vərəqləmək olduğunu bildi. Zərifə xanım canını, qanını Vətənin müdafiəsinə qurban verən Kərim kimi oğulun anası olduğu ilə fəxr etdiyini xüsusi ilə vurğuladı. Həyətdə dayandığımızdan narahat olan ana bizi təkidlə evə dəvət etdi.

...Xatirələr çözələndi. Şəkillərdən gülə-gülə bizə tamaşa edən Kərimin qısa, ancaq mənalı həyat hekayəsini anasının, həyat yoldaşının dilindən eşitdik: Kərim Məmmədov Gəncə şəhər 27 saylı tam orta məktəbini bitirib. Vətənə, elə-obaya xeyirli övlad olmaq arzusu ilə yaşayıb. Hərbi xidmətdə olduğu müddətdə nümunəvi xidmətinə görə dəfələrlə fəxri fərmanla, medalla təltif edilib. Daxili Qoşunlarda müddətdən artıq hərbi qulluqçu kimi Vətənə xidmət edən Kərim təhsilini davam etdirir, gizir kimi xidmətə başlayır. Yenə də nümunəvi xidmətinə görə fəxri fərmanlarla, diplomlarla təltif edilir, şəkili Şərəf lövhəsindən asılır.

Əfsanə xanım deyir ki, Kərim yarımçıq işi xoşlamazdı. 2020-ci ilin sentyabrın 16-da bel yırtığından əməliyyat olunmuşdu. Dövlət tərəfindən verilən 60 günlük məzuniyyətin heç 60 saatını özünə həsr etmədi, dincəlmədi, yenidən sevdiyi peşəsinə, iş başına qayıtdı. Əməliyyatdan çıxmasına baxmayaraq Vətən müharbəsində silahını əlinə alıb döyüş meydanına atıldı. Oktyabrın 2-də Murov uğrunda gedən döyüşlərdə şəhidlik zirvəsinə yüksəldi.

"Anasını, övladlarını hədsiz sevirdi. Əsgərləri də balalarından seçmirdi. Deyirdi ki, orda olan əsgərlər mənim balalarımdır. Mən onlara elə diqqət göstərməliyəm ki, onlar özlərini yalnız hiss etməsinlər" - Əfsanə xanım göz yaşlarını saxlaya bilmir.

"Adətən sözünü-sirrini ataya-anaya deyirsən. Mənim sirr yerim, söz yerim Kərim olub. Ürəyimdəkiləri onunla paylaşardım. Həmişə qar görməyi çox arzuladığımı deyərdim. Gəncəmiz demək olar ki, neçə qış fəslini qarsız yola salmışdı. Ötən qışda Gəncəyə əməlli-başlı qar yağdı. Kərim komandirindən icazə alıb, gəldi, bizi Gəncənin daha çox qarla örtülü hissələrinə apardı. Bu bizim Kərimilə ilə birlikdə keçrdiyimiz son qarlı günümüz oldu.

Tanrı Məmmədovlar ailəsinin taleyinə şəhidlik yazmışdı... Kərim ailəsindən, övladlarından çox Vətənini sevirdi. Ailə şəkillərinə baxıram... Ailə səadətinin şirinliyi onların gözlərindən, üzlərindəki təbəssümdən oxunur. Bir də şücaəti, igidliyi və vətənpərvərliyi ilə yadda qalan Kərimin "öncə Vətən!" ruhunun onun bütün ailə üzvlərinin varlığına hakim kəsildiyini görürük.

Məmmədovlar ailəsində Kərimin ilk nübar sevinci, qız övladı Zeynəb, oğul payı Hüeyn böyüyür. İndi ailənin ağır yükü Əfsanə Məmmədovanın çiyinlərinə düşüb. Həyat yoldaşının arzularına, ideyalarına sadiq olan bu vəfalı qadın Uca Yaradan güc, qüvvət istəyir. Kərimin yadigarı - Zeynəbi, Hüseyni onun vəsiyyət etdiyi kimi, milli ruhda yetişdirsin. Düşünür ki, Kərimdən sonra dərd içində özünü məhv etməyə mənəvi haqqı yoxdur, qarşıda onu böyük işlər gözləyir. Özünü toparlayıb həyatına davam etməli, Kərimin əqidəsinə sadiq, Vətənə layiq bir övladlar böyütməlidir.

Vətən uğrunda döyüşlərə yola düşəndə "məndən nigaran qalmayın" deyən Kərim narahat olma! Şəhidliyin ilə təkcə övladlarına deyil, Azərbaycan gənclərinə əsl örnək oldun.

Hicran Məmmədova,

YAP Gəncə şəhər təşkilatının mətbuat xidmətinin rəhbəri