Sosial şəbəkədə Biləsuvarın İsmətli kəndində yaşayan gənc bir müəllimin statusu və yerləşdirdiyi şəkil diqqətimi çəkdi. Uzun-uzadı nəsə yazmağa ehtiyac duymadım. Status müəllifi zatən bir cümlə və şəkillə hər şeyə aydınlıq gətirib. Ona görə bir başa mətləbə keçirəm.

Əvvəl gənc müəllimin yazdığı statusu oxuyun və yerləşdirdiyi şəklə baxın. Biləsuvarın İsmətli kəndində yaşayan gənc müəllim Ziya Ziyadov: "Nizami Gəncəvinin Biləsuvarda, İsmətlidəki baxımsız büstü. Təmir olunub məktəb qarşısında yerləşdirilsə, gözəl olar. Büst kəndin "Kolxoz Həyəti" adlanan ərazidə yerləşir".

Mənim diqqətimi nə cəlb elədi?!

Təbii ki, dahi Nizaminin büstünün bu vəziyyətdə olması acınacaqlıdır və biabırçılıqdır. Ən pisi isə bu büstü bərpa edib məktəbin qarşısında yerləşdirmək üçün müraciət edəcək ünvanımız hələlik yoxdur. Başı onun-bunun pulunu, malını oğurlamağa qarışmış Biləsuvarın İcra başcısı həbsdə, Mədəniyyət Nazirliyinin rəhbərliyinin bir qismi içəridə, digər qismi də... Buna görə Biləsuvardan olan gənc müəllimin bu təşəbbüsünə cavab verəcək şəxslər tapmaq müşkül məsələdir. Yeni müdirlər, başçılar... gözləmək lazım gələcək.

Ona görə gənc müəllimin bu təşəbbüsünə diqqət yönəldərək başqa bir təkliflə çıxış etmək qərarına gəldim. Aidiyyəti olmasa da, Təhsil Nazirliyi bu təşəbbüsə qoşulsa, necə olar?

Dahi Nizaminin büstünü bərpa edib kənd məktəbinin qarşısında yerləşdirsə, hamımız təşəkkür edərik...

Telejurnalist Şöhrət Əli