Valideynlərin bir uşağı məktəbə yollamaq üçün ən az nə qədər xərc çəkməli olduğunu araşdırmaq məqsədilə Gəncədəki məktəb ləvazimatları mağazalarına üz tutduq.

GancaPost.info saytı xəbər verir ki, mağazalarda hər qiymətə məhsul olduğu müşahidə edilir. Satıcılar bir-birindən elə də fərqlənməyən iki məhsul arasındakı qiymət fərqini ləvazimatın hansı ölkədə istehsal olunması ilə izah edirdilər.

Məsələn, 15 manata da məktəbli çantası tapmaq olar, 50 manata da.

Məktəb ləvazimatlarının qiymətləri isə belədir:

Qələm - 0,30 - 1 AZN

Dəftər - 0, 30 - 0,80

Plastilin - 1.50 - 3 AZN

Qələm qabları - 2 - 7 AZN

Pozan - 0,30 - 1 AZN

Rəngli karandaşlar 2,50 - 4 AZN

Flomasterlər - 2, - 2,50 AZN

Məktəblilərin ehtiyacları bunlarla bitmir. Hələ karandaş yonan 0.50, rəngli kağızlar və s. də almaq lazımdır. (Siyahını uzatmaq da olar).

Valideynlər məktəbli geyimlərinin bahalılığından şikayət edirlər.

İki uşaq anası Nərgiz xanımın sözlərinə görə, o, hər övladına görə 200 manat pul xərcləməli olub:

"Bu qiymətə hələ iş dəftərlərini, kitabları daxil etməmişəm. Buna görə də qiymətlərdən razı deyiləm. Elə ailələr var ki, ümumi büdcəsi 500 manatdır, evində də 2-3 uşağı məktəbə gedir. Belə ailələr o uşaqları hər şeylə necə təmin etsinlər? Kasıbları da düşünmək lazımdır".

Alıcılar ucuz məhsul almağın da sərf etmədiyini bildirirlər:

"İmkan o qədər deyil ki, gedib bahalısını alaq, ucuzunu aldıqda isə ilin ortasında yenidən almaq məcburiyyətində oluruq. Ona görə də orta qiymətdə olanı almağa çalışırıq".

Bir uşaq anası Vəfa xanım isə qiymətlərin keçən ilə nisbətən bahalaşdığını deyir:

"Hər şeyin bahalısı da var, ucuzu da. Amma bu il qiymətlərdə az da olsa artış hiss olunur. Bir uşağa görə ən az 150 manat pul lazımdır".

Satıcılar isə satışlardan razı olduqlarını qeyd etdilər. Onlar imkanından asılı olmayaraq hamının məktəb alış-verişi etməyə məcbur olduğunu, buna görə də son günlərdə alıcıların sayının xeyli artdığını bildirdilər.