Bloomberg yazır ki, Rusiya Venesuelaya nəğd dollar və avro şəklində 315 milyon dollar göndəribmiş.

Bloomberg jurnalistlərinin apardığı təhqiqat göstərib ki, bu pullar 2018-ci ilin mayı ilə 2019-cu ilin apreli arasında azı 6 əməliyyatın vasitəsilə Venesuelaya çatdırılıb.

Bu da bildirilir ki, nəğd dollarlar ABŞ sanksiyaları altında olan Venesuelaya beynəlxalq ticarət maneələrindən yan keçmək imkanı verib.

Bloomberg-in araşdırması İmportGenius sisteminin Rusiya gömrüyünə dair məlumatlarına əsaslanır. Bu beynəlxalq sistem ayrı-ayrı idxalçıların fəaliyyətini izləyir. Nəğd pullar Venesuelanın İnkişaf Bankına çatdırılırmış.

Jurnalistlər ehtimal edirlər ki, Venesuela bu pulları neft ixracından və ya özünün "qızıl ehtiyatının" satışından qazana bilərdi.

Təhqiqat nəticələrində deyilir ki, Venesuelaya nəğd pulların çatdırılması əməliyyatları 2018-ci ilin mayında başlanıb.

2018-ci ilin may və iyul ayında Rusiyadan Venesuelaya ümümi məbləği 55 milyon dollar olan iki tranş edilib.

Bloomberg pulların hansı valyutada olduğunu müəyyən edə bilməyib.

2019-cu ilin yanvarında Rusiyanın dövlət Gazprombank bankından aralarında bir-iki gün fasilə olmaqla 100 avroluqlarla 113 milyon avro və 50 milyon dollar nəğd pul daşınıb.

2019-cu ilin aprelində Moskvadan Venesuelaya nəğd şəklində daha 97 milyon dollar çatdırılıb.