Prezident İlham Əliyev dekabrın 5-də V çağırış Milli Məclisin buraxılması və növbədənkənar seçkilərin təyin edilməsi haqqında Sərəncam imzalayıb.

GancaPost saytı xəbər verir ku, Sərəncama əsasən V çağırış Milli Məclisi buraxılıb, Milli Məclisə növbədənkənar seçkilər 2020-ci il fevralın 9-na təyin edilib.

Növbədənkənar seçkilərə dövlət büdcəsindən 52 milyon manat vəsaitin ayrılacağı bildirilir.

Milli Məclisdə çoxluq təşkil edən hakim Yeni Azərbaycan Partiyasının deputatları dekabrın 2-də parlamentin buraxılması və növbədənkənar seçkilərin təyin edilməsi ilə bağlı Prezident İlham Əliyevə müraciət ediblər.

Dekabrın 4-də Konstitusiya Məhkəməsi prezidentin müraciətinə müsbət cavab verib.

Azərbaycanda sonuncu parlament seçkiləri 2015-ci ildə keçirilib. Hakim Yeni Azərbaycan Partiyası 125 yerdən 71-ni qazanıb, sonrakı yerləri VHP, BAXCP, AVP, MDHP, ADİP, BQP, VBP, ASDP, ASRP və ADMP qazanıblar.