Bugün ictimai-siyasi xadim, 1990-95-ci illərdə Gəncə şəhər Xalq Deputatları Məclisinin sədri, Azərbaycan Tərəqqi Partiyasının lideri, sabiq deputat Çingiz Dəmir oğlu Sadıqovun ölümündən 5 il keçir.

Çingiz Dəmir oğlu Sadıqov 1944-cü ildə Gəncə şəhərində anadan olmuşdur. 1973-1975-ci illərdə Xanlar rayon Aqrar İstehsalat Birliyinin baş direktorunun müavini işləmişdir.

1975-1990-ci illərdə Xanlar rayon və Gəncə şəhər partiya komitələrində müxtəlif məsul vəzifələrdə çalışmışdır.

1990-1995-ci illərdə isə Azərbaycan Respublikası Milli Məclisinin deputatı və Gəncə şəhər Xalq Deputatları Məclisinin sədri olmuşdur. 1999-cu ildə yaradılan Azərbaycan Tərəqqi Partiyasının qurucusu və ilk sədri olub.

Çingiz Dəmiroğlu 25 yanvar 2015-ci ildə Bakı şəhərində vəfat edib. Qəbri Gəncənin Fəxri Xiyabanındadır.
Çingiz Dəmiroğlu Azərbaycanda Demokratiya və Müstəqillik uğrunda aparılan mübarizənin daim ön sıralarında olub.

İllər keçəcək, tarix dəyişəcək, amma Çingiz Dəmiroğlu hər zaman Azərbaycan Dövlətçiliyinə, Xalqına sədaqətlə xidmət etmiş mübariz bir şəxsiyyət kimi Müstəqillik tariximizdə əbədi yaşayacaqdır!

Biz inanırıq ki, Çingiz Dəmiroğlunun müqəddəs arzuları mütləq həyata keçəcək və Azərbaycan Xalqı öz haqqını müdafiə etməyi ləyaqətlə bacaracaqdır.
Allah rəhmət eləsin! Ruhun şad, Məkanı cənnət olsun!

GancaPost.com